" المشهد الثالث "
( يفتح الستار علي مدينة الشيطان والاولاد وجوهم سودا وملابسهم مبهدلة )
مينا : انا زهقت من اللي احنا فيه ده
ماريان : وانا اللي كنت فاكرة اني هلاقي هنا العاب جديدة تفرحنا وتبسطنا
كيرلس : هو ده التغيير اللي كنا عايزينه
ايريني : انا حزينة علي حالنا اللي بقينا فيه
مريم : فعلا من بعد بيت بابا يسوع ملقناش فرح
كيرلس : عندك حق يا مريم فين فرحنا اللي كنا بنلاقيه في بيت ربنا
مينا : فرحنا في بابا يسوع اللي كان دايما معانا
مريم : طيب والحل انا عايزة ارجع لبيت بابا يسوع ( وتبدا تبكي ) انا مليش دعوة عايزة ارجع لبيت بابا يسوع
ماريان : ( تطبط علي مريم ) ما تعيطيش يا مريم انا السبب انا اللي قولتلكم تعالوا نجرب العاب الشيطان الجديدة
كيرلس : لا يا ماريان كلنا وافقنا ورحنا برجلينا مش انتي السبب
مينا : احنا كلنا غلطانين
ايريني : بابا يسوع اكيد مش هيسبنا
مريم : ( تهدا وتكف عن البكاء ) انا واثقة من كدا بس انا مش قادرة استحمل يوم تاني هنا
كيرلس : وانا كمان تعبت
( يدخل الشيطان هو والشيطان الصغير )
ابليس : مالكم عاملين دوشة كدا ليه ؟ انتوا مش مبسوطين هنا ولا ايه ؟
الشيطان الصغير : ده حتي هنا فيه العاب جميلة خالص شوفتوا بحيرة النار الجديدة
ماريان : احنا مش عايزين نقعد هنا تاني
كيرلس : احنا كلنا عايزين نرجع لمدينتنا
مريم : مدينتنا الجميلة اللي كل اللي فيها فرحانين ومبسوطين
مينا : انا عايز ارجع لبابا يسوع
ايريني : ومش عايزين منك أي وعود تانية انك هتبسطنا هنا
ابليس : انتوا فاكرين اننا بنلعب هنااا انتوا هتقعدوا سواء رضيتوا او لا دي حاجة غصب عنكم
الشيطان الصغير : انتوا حتي لسه ما شوفتوش كهف العقارب الجديد
ايريني : مش عايزين نشوف أي حاجة في مملكتكم الشريرة
مريم : ( بلهجة بكاء ) كفاية اني حتي شكلنا اتغير وفقدنا النعمة اللي بناخدها من بابا يسوع
كيرلس : احنا مكناش كدا مكنش ده شكلنا
ماريان : ولا دي هدومنا
مينا : فين صليبنا اللي كان معانا
ابليس : شكلكم وهدومكم وصليبكم انتوا مش هتشوفوا حاجة من الحاجات دي مرة تانية انتوا خلاص هنا في مملكتي سواء رضيتوا او لم ترضوا
الشيطان الصغير : طيب انا العب مع مين في بيت الثعابين الجديد
( الاولاد ينظرون لبعضهم البعض ويتجمعوا بعيد عن الشيطان )
ايريني : انا عرفت هنطلع ازاي من هنا
مريم : انتي بتفكري في اللي انا بفكر فيه
ايريني : ايوه يا مريم مفيش غير بابا يسوع هو اللي ممكن ينقذنا
كيرلس : ايوه بابا يسوع عمره ما اتخلي عننا واكيد لما نصليله هيسمعنا
ماريان : خلاص يلا نصلي كلنا لبابا يسوع علشان يرجعنا لبيته تاني
( يسجد الاولاد ناحية الشرق )
( صوت ترنيمة رجوع للمسيح )
ابليس : لااااا انتوا فاكرين هتهزموني كدا انتوا خلاص بقيتوا في ايدي
الشيطان الصغير : ( يبدوا عليه الخوف الشديد ويبتعد عن الصلاة )
( يظهر دخان و نور ابيض يخرج من ملاك الرب )
ملاك الرب : ابتعد عنهم يا ملعون انهم ابناء الرب وارسلني الرب اليهم كي انقذهم من يدك الرب سمع لصلاتهم وساخذهم لمدينة الرب مرة اخري وليس لك عليهم سلطان ابتعد باسم ربنا يسوع المسيح
ابليس : ( بخوف ويغطي نفسه بملابس سوداء ) لاااااا ابعد عني
الولاد : نشكرك يا بابا يسوع انك سمع صلاتنا وارسلت لينا ملاكك الحارس
الملاك : السلام لكم يااحباء المسيح ارسلني الرب اليكم لارجعكم الي مدينتكم تعالوا معي
( يغلق الستار علي مدينة الشيطان وفي ذلك الوقت يلبس الاولاد ملابسهم البيضاء ويتم نزع وجوهم وييقفوا علي بداية مدينة الرب )
( يفتح الستار علي مدينة الرب )
الكاهن : اولادي انتوا رجعتوا ازاي ومين جابكم لهنا
الاولاد : ( يجروا علي ابونا ويقبلوا يده والصليب ) ابونا احنا مش مصدقين اننا رجعنا لبيت بابا يسوع مرة تانية اللي جابنا وانقذنا الملاك الحارس بابا يسوع بعته لينا
الكاهن : ( ينظر ناحية الشرق ويرشم ذاته بعلامة الصليب ) نشكرك يارب علي عظم محبتك لينا وانك رجعت اولادك لحضن الكنيسة مرة تانية
الكاهن : يلا يا اولادي نقف كلنا ونشكر ربنا علي اللي عمله معانا
الكاهن : ( ينظر ناحية الشرق ويركع الاولاد من خلفه ) بسم الاب والابن والروح القدس الاله الواحد امين يارب ربنا يسوع المسيح نشكرك انه رغم اننا اوقات بنبتعد عن طريقتك وبنختار طريق الشيطان والشر وبيغرينا العالم بمشتهياته ولكن انت لا تتركنا ابدا و سريعا ما ترجعنا الي احضانك فانت اب رحيم حنون معين لاولادك دائما شكرا علي محبتك لينا يارب وانك رجعت اولادك كيرلس ومينا وماريان و ايريني ومريم لبيتك مرة تانية نشكرك دائما وبنطلب منك انك تحافظ عليهم دائما من عدو كل خير امين انك تسمع وتسجيب
الاولاد : امين
( يغلق الستار )
- مسرحية للاطفال اتمني ان تفيدكم جميعا
السبت 12 ديسمبر - 15:52 من طرف مينا فريد
